Þann 20. mars sl. stóðu SORPA, ReSource og Fenúr að Urðunardeginum þar sem m.a. starfsfólk Umhverfis- og orkustofnunar (UOS) héldu ávarp og erindi.
Dagurinn hófst með ávarpi frá Gesti Péturssyni, forstjóra Umhverfis- og orkustofnunar, um árangur síðustu ára og tækifærin sem felast í því að draga úr urðun. Rakel Sigurveig Kristjánsdóttir, sérfræðingur í teymi hringrásarhagkerfis, hélt erindi um tölfræði urðunar og skráningu gagna til UOS og Inga Rún Helgadóttir, sérfræðingur í teymi losunarbókhalds, fjallaði um losun frá urðun í losunarbókhaldi Íslands. Aðrir fyrirlesarar voru frá Verkís/Fumís, Environice, SORPU og ReSource International með lokaorðum frá Jóni Viggó Gunnarssyni framkvæmdarstjóra SORPU bs.
Ráðstefnan var vel sótt af opinberum aðilum sveitarfélaga og stofnanna auk annarra hagsmunaaðila úr atvinnugeira úrgangsmeðhöndlunar á Íslandi. Eftir vel framsett erindi sátu fyrirlesarar í pallborði þar sem tekið var við spurningum úr sal. Umræður voru áhugaverðar og sýndu ágæti þess að koma saman og ræða málefni urðunar á Íslandi. Auðveldara er að finna lausnir með opnum samskiptum allra hagaðila og var ráðstefnan mikilvægur liður í því.
Líkt og fram kemur í frétt ReSource um Urðunardaginn þá undirstrikaði ráðstefnan að sterkur áhugi og vilji er til staðar til að þróa og bæta meðhöndlun úrgangs á Íslandi. Með auknu samstarfi er unnt að draga verulega úr urðun, lágmarka umhverfisáhrif og efla sjálfbæra nýtingu auðlinda á Íslandi.
