Nú þegar hvílir skylda á byggingaraðilum samkvæmt byggingarreglugerð nr. 112/2012 að útbúa áætlun um meðhöndlun byggingar- og niðurrifsúrgangs áður en framkvæmd hefst þar sem koma skulu fram upplýsingar um skipulagningu, skráningu, flokkun, endurnýtingu og förgun úrgangs. Slíkri áætlun á að skila til sveitarfélaga með umsókn um byggingarleyfi fyrir framkvæmdir yfir ákveðinni stærð.

Núverandi landsmarkmið um flokkun byggingar- og niðurrifsúrgangs er 70% en markmiðið er í samræmi við markmið Rammatilskipunar Evrópusambandsins frá árinu 2008. Samkvæmt þessu skal 70% byggingar- og niðurrifsúrgangs fara í undirbúning fyrir endurnotkun, endurvinnslu eða aðra efnisendurnýtingu, þ.m.t. fyllingu svo lengi sem að úrgangurinn kemur í stað annars efnis sem ekki er úrgangur.

Í Vegvísi um vistvænni mannvirkjagerð, sem samstarfsvettvangurinn Byggjum grænni framtíð gaf út, eru tillögur um markmið fyrir árið 2030 þannig að 95% byggingar- og niðurrifsúrgangs fari í endurnýtingu og 5% í förgun. Einnig er tillaga um markmið um 30% samdrátt á byggingar- og niðurrifsúrgangi sem fellur til á hvern byggðan fermetra.